أحــــــلام شاعــــــــــــــــــر
حسن هادي الشمري
1 -
أحلم أشوفّن طفل
لازم بإديه طبشـــــــور
يرسم نهر من عشكَ
ويبوسلّه بناعـــــــــــور
يحضّن الماي بفرح
يفرغه ويرّد يــــــــــدور
وفوكَه يرسم سما
وأسراب من طيـــــــــور
مو بندقية قتل
لو خنجر وشاجــــــــــور
لو قفص مثل السجن
محبوس بيه عصفــــــور
2 -
أحلم أشوفن طفل
يلعب بمرجوحـــــــــــــه
يجمع نجوم السما
يطشهّن على روحــــــه
يمسح دموع الوطن
ويبوسلّه جروحـــــــــــه
مو طفل من الحزن
ينوح بوجع نوحّـــــــــــــه
وبيده حمامة فرح
بسجين مذبوحـــــــــــــه
بالليل فوكَ السما
يكتب حروف الوطن
من يفّز غبشّه الصبح
يلكَاها ممسوحــــــــــــه
3 -
أحلم أشوفنّ طفل
بيدّه قلم وكتــــــــــــــاب
يرسم خريطة وطن
يعلكَها فوكَ البــــــــــــاب
يقره قصايد شعر
لدرويش والسيـــــــــــاب
مو طفل ناسّي الفرح
عريان ماكو ثيـــــــــــــاب
جوعان وبلا خبز
يلهم بديه تـــــــــــــــراب
4 -
أحلم أشوفّن طفل
يلبسلّه ثوب إجديـــــــــد
بعيونه يغفى الفرح
يضحك وياه العيــــــــــــد
إتدنكَ تبوسه الشمس
وتكَله ها شتريــــــــــــد
مو طفل يبجي بحزن
عايش يتيم وحيـــــــــــد
ملينّأ يا هلوطن
مات بصدرنا الفرح
بس الحجي شيفيــــــــد
........ شيفيـــــــــــــــــــد
ليست هناك تعليقات:
إرسال تعليق